أمثال مغربية

موضوع: أمثال مغربية الأحد أكتوبر 10, 2010 3:25 pm

* اللي قالك لا تقولو و اللي سولك لا تعطيه خبار.
* معرفة الرجال كنوز.
* يلى شفتيهم دورو علينا عرف حاجتهم فينا.
* اطلع تاكل الباكور انزل شكون قالهالك.
* اللهم لعمش ولا العمى
* الحر بالغمزة و العبد بالدبزة.
* ما وراء الشدة الا الفرج.
* اللي تيتسحر مع الدراري كيصبح فاطر.
* حاول على حميرك تحج عليه.
* اللي فاتك خليه لبناتك.
* الله ينجيك من الساكت الى دوى أومن المشتاق الى داق أومن البيرة الى تضرب عليها الصداق.
* دوز على الواد الهرهوري و لا دوز على الواد الساكوتي.
* مول التاج أو كيحتاج.
* اللي عضو الحنش كيخاف من الحبل.
* خدم يا التاعس من سعد الناعس.
* اللي كيربي ولاد الناس بحال اللي كيدق الما فالمهراز.
* نوضوها تشطح دارتها بصح.
* اتاي لعشية خير من بقرة مشوية.
* كيسحابلي كرمة وفيها الكرموص سعا هي خربة و مجموع عليها الناموس.
* الي ما عندو هم كتولدو لو حمارتو.
* يد في الطبق و عين على من زهق.
* تعلمو يا الحجاما فروس ليتاما.
* بحال الي تيسعى بولدو على كتفو هو تيقول انت على الله و ولده تيقول الله يجيب.
* جبنا القرع يونسنا عرى راسو و هوسنا.
* دابزو يا الفيران على خميرة الجيران.
* الزواج و الموت هم لا يفوت.
* المراة الحرة ما تاكل غير من يد زوجها.
* الراجل بدراعو ماشي بمتاعو.
* اللي حبك حبو و لقلبك زوجو و اللي جفاك جفيه و تعداه و دوزو.
* تهجالت لعناية و لا زواج الدل.
* خود بنت قرابة و لا تاخد بنت غرابة.
* يا الطامع في الزيادة رد بالك من النقصان.
* ابنادم دربو على حلقو ينسى اللي خلقو.
* يلا كان خوك عسل ما تلعقوش كلو.
* التربية في الصغر كالنقش على الحجر.
* العصى ما كتخلي من يعصى.
* ولد ولدك زوين ما تعدمشي اللي يبوسو.
* لهلا يورينا فولادنا ميخلعنا.
* اللي دارتو المعفونة كياكلوه ولادها .
* عيطت على ديالي جاني عيطت على ديال الناس مشى و خلاني.
* اللي كثرو همومو كثرو اعجوبو.
* يلا بغيتي اتوحش صاحبك سلفو.
* اللي درقك ابخيط درقو بحيط.
* تيدور الزرع حتى كيدور وكيرجع لعين الرحى.
* يلا امشا الزين كيبقاو حروفه ويلا امشا المال كيبقاو خروقه.
* الخير كيجلس والهم كيكمش.
* كيدق ويقول شكون.
* كيبيعو القرد ويضحكو على لي شراه.
* الغربة كتلوح حتى لبلاد الشلوح.
* ما يحس بالمزود غير اللي مضروب بيه.
* اللي دارها بيديه يفكها بسنيه.
* قالو اشخصك يا لعريان قالو الخاتم يا مولاي.
* ما بين اللقمة و الفم تيريد ويحكم.
* الضحك كيفصخ البيع وشرا.
* اللي حبك ما بنالك قصر واللي كرهك ما حفرلك قبر.
* اللي تيكون اناني تيبقى وحداني.
* اللي اربحتيه تاكله و الدين باش تخلصو ؟
* اللي ما جابتو المحبة ما تجيبو الحزارة.
* اللحية مكترفد اللحية غير لقبر.
* اليد اللي طعمتنا الحلال تيكونو ناسها قلال.
* خليني نبلع ريقي حتى نعرف عدوي من صديقي.
* اللي ربط حمارو مع الحمير كيتعلم الشهيق و النهيق و الخروج على الطريق.
* اللسان طويل و الدرع قصير.
* اش يقدك من ستغفر الله يا البايت بلا اعشى.
* الجمل ما كيشوفش حدبتو كيشوف غير حدبت خوه.
* ما ينفع غير الصحيح اما الراشي كايديه الريح.
* اللهم لعمش ولا لعمى.
* اللي شاف شي يقول الله يستر.
* مول البنات ما يبات هاني.
* ازرب تعطل.
* لو كان الخير فيا ما يتزوج راجلي عليا.
* كان راجلي واصبحت انعشقو.
* يعيى من يعطي وما يعيى من يشد.
* اللي حبابو عريانين عمرو ما يتكسى.
* ملي كطيح البقرة تيقواو السكاكن.
* اللي احشم فما ضرو الشيطان غرو.
* لو كان الخوخ يداوي لو كان داوى راسو.
* الله يجيب اللي يفهمنا ولا يعطنا والو .
* هاك ابوه رجليه جابوه.
* حتى يخلاق عاد نسميوه عبد الرزاق.
* الله يعطينا شي نقرة فين يغبر نحاسنا.
* حتى قط مكيهرب من دار العرس.
* الصنعة يلا ما غنات كتستر واقيلة كتزيد فلعمر.
* اشعند الميت ما يدير قدام غسالو.
* شحال ما طال الليل كيصبح النهار.
* جلسة احسن من وكلة.
* نقا على نقا ما تيورد شقا.
* الزيادة من راس لحمق.
* كول بشهوتك و لبس بشهوت الناس.
* قالو اشمتك قالو اعرفتك.
* شد تصيب ما اتحل.
* اللي احفر شي حفرة كيطيح فيها.
* اللي ما لقى الخير فركانو يكون الخير فلسانو.
* ما دير خير ما يطر باس.
* شطارت الكوزينة كتشري مدينة .
* حاسبني حساب عدوك و جلسني بلاصت خوك.
* دهن شواربك بالسمن و دوز على عدوك مصبن.
* اللي ماجي لعندك لا تمشي عنده.
* اللي اتخدمو طيعو و اللي اترهنو بيعو.
* كن اسبع و كولني.
* يلا شفتيها بسعدها عرفها مكملا من عندها.
* ما تشري حتى تقلب و ما تصاحب حتى تجرب.
* امدح صاحبك قدام الناس و لوح صحبك الراس فالراس.
* العراضة سنة و العاقل ما كيدنى.
* حج و حاجة و قضيان حاجة.
* يلا فاتك الكلام قول اسمعت ويلا فاتك الطعام قول اشبعت.
* كل غيبة كتزيد هيبة.
* عز الخيل مرابطها.
* اللي تيركب لحصان كل الناس اتوسعلو لمكان.
* العز والنصر والسكنة فلقصر.
* الموت بالردم ولا معاشرت لخدم.
* سوق النسا سوق مطيار يا الداخلو رد بالك يوريوك من الربح قنطار وياكلولك راس مالك.
* ديرها فالرجال وترجاها و ديرها فالنسا و لا تنساها.
* مراة المنحوس ما هية مطللقة ما هية عروس.
* حالتي حالت النافخ العافية على قلبو و الطيقان فجنبو.
* ملي تنحتاجك يا وجهي كيخبشوك لقطوط.

* الجوع و النوع و البكا بلا دموع.
* منحوس منحوس و لو على راسو فانوس
* عمرو ما احبى وملي احبى طاح فلبير.
* رضينا بالهم والهم ما رضا بينا درناه عند راسنا صبح عند رجلينا.
* الحنة حرشة و الحناية عمشة و العروسة فيها بو تفتاف.
* محيلي المكتوب وانا انتوب.
* حسدو العمى على عكازو.
* عاند ولا تحسد.
* السفيه ما كينطق غي بلي فيه.
* ودن صمة و الاخرى فيها الماء.
* اللي ما شاف من عين الغربال اعمى.
* لي ساومك بتصرفيقا فحال الى راه صرفقك.
* القرع بفلوسو ارى ديك الراس نبوسو.
* ادفع ما في الجيب يجيب الله ما في الغيب
الشهر لي منشد كراه اش دخلني في حسابو.
اللي بغا لعسل يصبر لقريص نحل واللي بغا الزين يصبر لتقيب لودنين.
جا يعاونو على قبر باه هرب ليه بالفاس.
هاك و أرى ما فيها حزارا.
هبش تجبد حنش .
كنعفط على زبيبة او كطلع معايا حلاوتها .
انت غير كْمكْم ونا نفهم .
الراس لمغطي حسن من الراس العريان .
كول مع خويك وشرب مع خويك وحضي من خويك لهرب ليك بالحكيك .
كفن غريب ولا شكارة خاوية .
الفم المسدود ما دخلو دبانة
لهلا يعطيك ما عطا لطراح وجهو لنار و ظهرو لعار.
بلمهل كيتكال بودنجال.
قال ليه راه الكلب سرط عظم قال ليه عند .......... تسمع عواه.
اللي في عمر نهار حسبو مات .
اللي ما يطعمك عند جوعك ولا يحضر ليك في مصايب ما تحسبو من عنواك قد حاضر قد غايب.
لا في جبل واد معلوم ولا في شتا ريح دافي لا في العدو قلب مرحوم ولا في نسا عهد وافي.
يالي تعيط قدام الباب عيط ومن فاهم ما يفسد بين لحباب غير نسا أو دراهم.
اللي ما عندو بنات ما عرفوه الناس باش مات .

تحياتي

» كلمات نقولها غلط و أمثال محرمة شرعا
» إعلان هام ... طلب مشرفين ومشرفات لمنتديات مغربية
» بالصور حلويات مغربية
» حلوى مغربية- بريوات باللوز-
» وصفات مغربية مصورة من القناة التانية